Mounir Nasraoui (i buryo) ariko arifotora n’umuhungu wiwe w’umuyabaga mu rukino Espagne ytsinzemwo Ubwongereza 2-1 mu rukino rwa nyuma rwa Euro

Bivugwa ko se w’umukinyi rurangiranwa w’umupira w’amaguru muri Espagne w’imyaka 17, Lamine Yamal yacumiswe imbugita kenshi ari muri parikingi.

Inkuru ziva mu binyamakuru vyo muri Espagne zivuga ko Mounir Nasraoui yatewe ari mu gisagara kiri ku kivuko ca Mataró, mu buraruko bwa Barcelone, ku musi wa gatatu mw’ijoro n’umugwi w’abantu bari bavuganye hakiri ku murango.

Igipolisi ca Espagne cemeje ko abantu batatu bahagaritswe ku musi wa gatatu, uwundi wa kane akaba yahagaritswe ku wa kane mu gitondo.

Nasraoui yaciye ajanwa kwa muganga i Barcelone aremvye cane ariko ubu bivugwa ko hari akarusho gusumba uko bamutwaye ameze.

Ico gitero cabereye hagufi hagufi ya Rocafonda aho Yamal yakuriye.

Kare mu gitondo, bivugwa ko Nasraoui yari yagiranye ikibazo n’umugwi w’abantu bahuye ariko aratembereza imbwa, nk’uko vyandikwa n’ikinyamakuru El Pais co muri Espagne.

Mu nyuma yegerewe n’uwo mugwi nyene ari muri parikingi baca “baramucumita incuro nyinshi”.